Home » » Guyube PAPELING ning Ambalwarsane Serulingmas ke-25

Guyube PAPELING ning Ambalwarsane Serulingmas ke-25

Written By Wahyu Triono on 26/05/17 | 09.56

Minggu, 21 Mei 2017 Paguyuban Seruan Eling Banyumas (SERULINGMAS) nylenggarakna acara puncak "AMBALWARSA SERULINGMAS KAPING 25" ning Gedung LEMHANNAS, Kebon Sirih, Jakarta Pusat. Ora baen-baen semangere acara ning LEMHANNAS, tamu sing rawuh akeh pisan angger dietung kosi ewonan. Sing profesine Jendral, anggota TNI, anggota POLRI, Mantan Menteri, Pejabat aktif, pengusaha, pedagang, juru masak, tukang potrek, tukang listrik, tukang kenong, tukang gong, buruh lan liyane tumplek blek dadi sepanggonan. Sedulur sekang Kab. Banyumas, Purbalingga, Cilacap & Banjarnegara kabeh nyawiji & nyedulur ning acara kuwe.

Acara uga dirawuhi para penggede Serulingmas yakuwe : Bp. Wisnu Suhardono selaku Ketua Umum Serulingmas, Bp. Soedjarwo selaku wakil ketua Umus Serulingmas, Bp. Yuwono Kolopaking (pembina), Bp. Subiyakto Cakrawerdaya (Pembina), Bp. Bagus Puruhito (pengurus/WAGUB LEMHANNAS), para ketua Paguyuban Kabupaten Kota lan esih akeh maning.

Apa PAPELING melu ngramekna? ya mesti banget angger cara iklane "NGGAK ADA LOE NGGAK RAME, GITU LOH". Papeling ngirim 3 unit kegiatane kanggo nyemangerna acara ambalwarsa serulingmas yakuwe : "KENTONGAN PANDAWA PAPELING", gending gagrak banyumasan "SEKAR PANJI PAPELING" karo team "BIKER PAPELING". Lha kuwe ngapa baen deneng kosi 3 tim mudun? Jawabane kaya kiye kakang-mbekayu, Kentongan Pandawa Papeling sing tampil ning lobby ngarep, nyambut tamu sing nembe pada rawuh, angger tamune nom-noman lang seneng karo seni banyumasan biasana krungu tabuhane Pandawa Papeling ya banjur melu jogedan, gidrohan, jimprakan kaya badut. Tamu sing numpak mobil, parkire diarahna daning tim "BIKER PAPELING". Para tamu mlebu maring ruangan acara ning njero disuguhi musik gendingan"SEKAR PANJI PAPELING" sing swasanane nyampleng dadi tamu ngrasa kaya "bendara mlebu kraton".

Acara tambah meriah merga dihibur daning artis Bening Septaria (artis asli Purbalingga) & Band "POWER SLAVE" sing kondang ning tahun 90-an.Ning acara kuwe uga ana penyerahan tropi bergilir Ketua Umum futsal "SEDULURAN BANYUMASAN" sing juara tahun kiye dicekel ning sedulur "Braling Mania Batavia" sedulure PAPELING sing dadi suporter PERSIBANGGA. (red.wahyu triono)









Share this article :
Comments
0 Comments

Posting Komentar

 
Design by: Darmanto.com - Copyright © 2011. Paguyuban Perantau Purbalingga - PAPELING
Powered by Blogger